Jang iko artis dong ...

Belajar Bahasa di Kupang

Kenangan Januari 2008 di Kupang Nusa Tenggara Timur

SU foe apa ko ini Ama Kolo deng Ina Feok bapolok ko badansa.
Dong pung dansa ju bukan satu-satu sa. Laen kali dong badansa gaya portu sampe kas angka kaki tinggi-tinggi,
laen kali badansa biasa sa. Dong ju mulai putar lagu remember sampe lagu kol'ana.

Pokonya laki bini tu son tau forduli sapa-sapa. Yang penting buka lagu dansa trus dong dua mulai bapolok ko inga waktu dolo. Kalo lia dong dua ju karmana ko. Ko mo lawan. Maitua sanyum trus. Dia pung laki ju bagitu. Pokonya dong dua mo hepi.

Sampe-sampe Ama Tobo deng Bai Ndu datang ju dong dua tatap bagitu na.
Dari jau Tobo su makan gigi. ko siang bolong bagitu su bapolok terang-terang bekin dia pung badan ke tar enak. Ma dia maju sa. Na kalo lia ada orang na musti malu to. Ma dong dua tatap bapolok. Tarakhir Ama Kolo hanya bilang gut bai esterlin.
Tua omong bagitu karena ingat ada lagu esterlin yang bu ian ulukyanan nyanyi itu hari.

"Kalo laki bini tu di dalam sana," Ama Tobo kastau Ama Kolo sambel kas tunju tangan pi kamar sana. Ama Kolo ju sanyum-sanyum sa. Dia hanya bilang kalo laki bini tu jang stres. Jang cepa mara deng musti sante to.
Dia bilang kalo maen mara trus nanti bisa bekin umur tamba pendek. Lebe bae kalo mo snang na senang. Kalo mo mara ju neu supaya abis to.

Kamudian Ama Kolo ju bilang lai. Lia itu artis dong.
Dong tiap hari ketawa deng senang trus. Biar ada baurus mo cere ato talak.
Samua soal dong hadapi deng tenang, hadapi deng sanyum.
"Na kalo bagitu lu mo iko cere ko. Ina dengar dolo. Ama Kolo su mo cere sang lu," Ama Tobo su kastau Ina Feok yang ada pagang-pagang Ama Kolo pung tangan. Dengar bagitu dia ju bilang, kalo dia pung laki tu son biasa bekin bagitu. Dia salalu satia sampe mati. "Be parcaya saratus persen ooo. Ma kalo di luar sana dia masi masnana'ok na neu.
Be son tanggong jawab. Kalo mati na tanggong jawab masing-masing pi tete manis sana,"
Ina Feok ke mulai terpengaruh deng Ama Tobo pung omong.

Tobo ju masi kas inga dong dua lai. Dia bilang kalo senang tu jang talalu. Nanti lupa diri ju.
Lia sa itu artis dong. Karena talalu senang sampe-sampe bajalan sabarang pi bar ato restoran.
Dong ke lupa diri deng lupa status. Dong bekin diri ke masi ana muda. Dong bapacar sana sini.
Na kalo bini ato laki tau itu dia pung ancaman tu cere to.

"Itu lu pung otak kotor. Jang kas banding ketong deng artis. Ketong tu hanya mo senang-senang sa. Lu tao ko sonde. Ini hari ketong laki bini ada rayakan ulang taon pernikahan.
Andia ketong rasa senang, bangga deng bisa idop batahan sampe sakarang," Ama Kolo kestau Ama Tobo.

Sakarang tu Ama Kolo bilang bukan artis sa dong bakalai deng cere. Di mana-mana banya laki bini yang su cere. Hanya koran sa yang son angka. Koran dong angka artis ato pejabat cere karena dong tu su masok dalam wilayah publik.

Coba lu lia sa. Di kampong sana tu banyak yang su kawen cere, bini dua deng laki ju banya.
Jadi jang bilang artis ato pejabat sa. Ini barang targantung ketong pung katahanan diri.
Kalo son kandali diri na bisa jato to. Ato cara yang lebe baik tu mangindar. Kalo baajak pi di bar ato danding na tolak. Itu ketong bisa masok dalam masa percobaan. Di itu tampa tu jahat na.
Repot kalo aparat dong mulai operasi dan tangkap. Apalai nanti wartawan dong batulis bekin kaco lai. Kalo dong babumbu karmana oooo. Ada ju adi dong bekin-bekin na.
Kalo kana dong pung kelu ju karmana ooo...

(disalin dari Harian Pos Kupang Tanggal 29 Februari 2008 hal.2 kolom Tapaleuk oleh thomas duran)